IWIinvestorNgā kōrero haumi mārama nei, ngāwari nei, kaupapa wātea nei nā IWIinvestor
Nā Sarah Delany te kōrero, nā Reo Whairawa Limited te whakamāori
He kaha te pātaitanga mai mēnā rānei ka haumi mātau ki ngā kamupene nō Aotearoa. Kaua e māharahara, kua whakahaumihia ā mātau huinga haumitanga katoa ki ngā kamupene 40 o Aotearoa kua whakaraupapahia ki Te Paehoko o Aotearoa.
Engari he mea nui te haumi ki tāwahi hoki. Koirā te take e nui ake ai ngā tūtanga pakihi huriao ki roto i ā mātau huinga haumitanga, tēnā i ngā tūtanga pakihi o Aotearoa. Tirohia ā mātau huinga haumitanga matua me ngā tiritiringa.
Ka whai wāhi mai ngā kamupene huriao ki a tātau i ia rā, i ia rā. Kia tirohia te rā...
Ka whakakāngia tō pūmahana...
Kāore e kore he Mitsubishi te kātū, koia tētahi o ngā kaiwhakarato pūmahana hau nui katoa i Aotearoa. Koia hoki te kamupene hokohoko nui katoa i Hapani, kō atu i te kotahi rau, e whā tekau mā rima mano ngā kaimahi huri noa i te ao.
Ka tirohia tō waea....
Kāore e kore he iphone te kātū. Kotahi ira rua piriona ngā tāngata e whakamahi ana i ngā putanga nō Apple i ia rā, i ia rā. He pērā rawa te nui o Apple, e whitu anake ngā taiao huri noa i te ao, e nui ake ai te Wāriu Tōpūtanga Hua i tō Apple. Ko Apple te kamupene hangarau nui katoa i te ao.
Ka kai koe i tō tina....
Mehemea ko Makitānara, ko koutou ko te ono tekau mā iwa miriona kiritaki kē atu i tēnei rā. Ka whakawhiwhia rātau ki te pūtea i ngā wharekai, i ngā rēti, i ngā tiringa, me ngā utu hononga kamupene. Ko Makitānara te kaiwhakawhiwhi mahi tūmataiti nui rawa atu tuarua i te ao (ko Walmart te tuatahi).
Ka hīrere koe...
Tērā pea ka whakamahia e koe tētahi putanga Unilever, pērā i te Dove, i te Lifebuoy, i te Sunsilk, i te Lux, i te Sunlight, i te Rexona rānei. Ka hangaia e Unilever te kai, te kīnaki, te kai a te pēpi, te waireka, te putanga whakapai, te kai a te mōkai, te tī, hei tauira noa. E toru ira whā piriona ngā tāngata e whakamahi ana i te putanga Unilever i ia rā, i ia rā.
Koinei ētahi tauira anake o te whai wāhi mai o ngā kamupene huriao ki a tātau. Hei kiritaki o ngā putanga me ngā ratonga o ēnei kamupene huriao, ki ō mātau whakaaro me huri hei kaihaumi hoki, mā te hokohoko tūtanga pakihi e whai wāhanga ai i te kamupene.
Hei kaiwhai tūtanga, ka whaipānga ki roto i te angitutanga, i te tupu o te wāriu, i te whaipūtea anō hoki. Heoti, me manawanui tātau ki ngā piki me ngā heke o te wāriu kei ahu mai nā ngā āhuatanga ōhanga rānei, nā te whaihua o te kamupene rānei.
Ko ngā painga me ngā tūraru he āhuatanga nō te kaiwhai tūtanga.
Mō ētahi mōhiohio anō, kia whakapā atu koe ki tō kaitohu rānei, kia īmera rānei ki: info@iwiinvestor.co.nz
Hei whai i ngā kōrero kē atu mō āu haumitanga rānei, mō ā tāu Tarāti rānei, kei takaroa te whakapā mai, ki info@iwiinvestor.co.nz.
Hei Parenga: He pānga whānui noa nei nō ngā kōrero kei roto i tēnei whakaputanga. Kāore pea e hāngai pū ki ngā āhuatanga takitahi. I ngā wā katoa, i mua i ngā whakataunga hāumiumi, me whai ngā tohutohu ahumoni a tētehi Kaitūtohu Ahumoni e mahi ana i raro i te raihana FMA.